Hilmar Árni Halldórsson, sem lagði skóna á hilluna á dögunum, var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni, sem kemur út alla föstudaga á 433.is.
Hilmar lagði skóna á hilluna um síðustu helgi eftir 3-2 sigur Stjörnunnar á FH, þar sem hann einmitt skoraði. Hann átti glæsilegan feril og í Garðabænum, spilaði 473 leiki og skoraði 155 mörk.
„Það er mjög erfitt að lýsa þessari tilfinningu. Þetta er einhver tómleiki, það er þakklæti, mikill tilfinningalegur kokteill. Fyrsta hálftímann eftir leik var maður að reyna að átta sig á öllum þessum tilfinningum,“ sagði Hilmar í þættinum.
Hilmar, sem nú snýr sér að þjálfun yngri flokka hjá Stjörunni, sagði að hann hafi áður íhugað að leggja skóna á hilluna, það var fyrir nokkrum árum síðan.
„Þegar ég skrifaði undir þennan samning eða samninginn á undan sagði ég þeim að ég gæti alveg séð fyrir mér að hætta í fótbolta, þá 26-27 ára og jafnvel að spila minn besta fótbolta. Ég tengdi ekki alveg við umhverfið á þeim tíma, fann mig ekki alveg í áttinni sem mér fannst fótboltinn vera að stefna í,“ sagði hann.
„Það varð ákveðinn viðsnúningur þegar ég meiddist svo. Þá neyddist ég til að horfa á íþróttina sem ég hafði alla ævi verið í frá hliðarlínunni. Þá áttaði maður sig á hvað þessi íþrótt skiptir miklu máli og hefur gefið manni. Þá fóru hjólin að snúast innra með mér. Nú sé ég að ég var aldrei að fara að labba í burtu frá þessari íþrótt. Ég sé hana sem ótrúlega öflugt tól til að gera alls kyns hluti.“
Hilmar var þá spurður að hvaða leyti honum líkaði ekki sú átt sem honum fannst fótboltinn stefna í á sínum tíma.
„Það er fyndið að ég segi þetta spilandi á Íslandi, en þegar peningarnir eru svona miklir og þú ferð að horfa á íþrótt sem skiptir þig svo miklu máli, hefur gefið þér svo margt, sem þér finnst að eigi að standa fyrir ákveðna hluti, þú sérð það í sjónvarpinu hverja helgi að hún samræmist ekki alveg þinni hugsjón. Tökum dæmi dæmi eins og Kylian Mbappe, þar ertu með gaur sem „transcendar“ íþróttinni á mjög neikvæðan hátt að mér finnst. Hann verður eitthvað vörumerki og jafnvel stærri en heilu klúbbarnir. Þetta fer gegn svo mörgu sem þér finnst að íþróttir eigi að snúast að. Það verður einhver biluð einstaklingshyggja í íþróttinni sem stuðaði mig.“
Hilmar var ansi nálægt því að verða markakóngur efstu deildar 2018 en sýndi umræðunni um það ekki mikinn áhuga.
„Þegar umræðan í kringum mig og markametið fór af stað, eins og á hverju tímabili, það var táknrænt fyrir þetta í íþróttinni. Það mátti aldrei koma því að hvað við gerðum sem heild eða fórninni sem við færðum, þetta snerist bara um hvort þessi einstaklingur gæti skorað annað mark svo við gætum hampað honum sem meiri en aðrir. Ég átti erfitt með þetta.“
Þó Hilmar hafi tekið ákvörðun um að hætta ekki í fótbolta á sínum tíma telur hann nokkuð öruggt að nú muni hann ekki snúa aftur á völlinn.
„Ég get bara tekið ákvörðun út frá deginum í dag og ég er nokkuð sannfærður um að ég muni ekki spila aftur.“
Umræðan í heild er í spilaranum.
