A landslið karla mætir Wales á Laugardalsvelli á föstudag í Þjóðadeild UEFA, í fyrri heimaleiknum af tveimur í október. Íslenska liðið mætir síðan Tyrklandi á mánudag.
Rétt rúmlega 4 þúsund miðar eru seldir á Ísland-Wales. Þar af eru um 1 þúsund miðar til stuðningsmanna welska liðsins. Tæplega 2 þúsund miðar eru seldir á Ísland-Tyrkland.
Miðasala á báða leiki er í fullum gangi á vefsvæði Tix. Báðir leikir hefjast kl. 18:45 og eru þeir báðir jafnframt í beinni útsendingu og opinni dagskrá á Stöð 2 sport.
Wales er með 4 stig eftir fyrstu tvær umferðirnar í riðlinum, en Walesverjar byrjuðu á því að gera markalaust jafntefli við Tyrkland og unnu síðan 2-1 útisigur á Svartfellingum. Ísland er með 3 stig og markatöluna 3-3 eftir tveggja marka sigur gegn Svartfjallalandi á Laugardalsvellinum og tveggja marka tap gegn Tyrklandi í Izmir.
Ísland hefur einu sinni unnið Wales í 7 viðureignum í A landsliðum karla. Sá sigur kom á Laugardalsvelli í undankeppni HM 1986 og skoraði Magnús Bergs eina mark leiksins. Þetta reyndust einu stig íslenska liðsins í fjögurra liða riðli, þar sem einnig voru lið Skotlands og Spánar.
