Wayne Bridge viðurkennir að hann hafi allan sinn feril verið í skugga landa síns Ashley Cole sem er einn besti vinstri bakvörður sögunnar.

Bridge var fenginn til Chelsea árið 2003 frá Southampton og spilaði vel til að byrja með áður en Chelsea ákvað að fá til sín Cole frá Arsenal.

Cole tók yfir stöðu Bridge á Stamford Bridge sem varð til þess að hann færði sig yfir til Manchester City árið 2009.

Ekki nóg með það heldur tók Cole einnig sæti Bridge í enska landsliðinu en sá síðarnefndi lék þó 36 landsleiki.

,,Ég var að spila vel þegar Ashley mætti á svæðið og hann kom ekki beint inn í byrjunarliðið,“ sagði Bridge um Chelsea.

,,Ég man eftir leik gegn Charlton þar sem við vorum 1-0 yfir áður en þeir jöfnuðu. Ég var tekinn af velli og vissi að þetta væru mín endalok.“

Bridge tjáir sig svo um skiptin til City og viðurkennir að hafa elt peningana til Manchester.

,,Það var allt annað að mæta inn í lið sem var að ganga í gegnum svo miklar breytingar. Ég elti peningana.“

,,Chelsea gat ekki fengið Ashley á sínum tíma svo þeir fengu mig. City gat ekki fengið Ashley svo þeir fengu mig!“