Halldór Árnason þjálfari Breiðabliks segist klár í slaginn fyrir sunnudaginn þegar úrslitaleikur Bestu deildarinnar fer fram.

Aðeins einn leikmaður Breiðabliks er frá vegna meiðsla. „Staðan á hópnum er mjög góð eins og hún hefur verið seinni part sumars, það er Alexander Helgi sem hefur verið frá í smá tíma og er ekki leikfær á sunnudag. Aðrir eru klárir,“ sagði Halldór á fréttamannafundi í dag.

Halldór var á þremur gulum spjöldum fyrir leikinn gegn Stjörnunni síðustu helgi og var meðvitaður um það en Arnar Gunnlaugsson þjálfari Víkings fékk sitt fjórða gula síðustu helgi og verður í banni. Fjórða dómara í leik Breiðabliks og Stjörnunnar fannst furðulegt hversu rólegur Halldór var.

„Samtalið var þannig að Jóhann Inga fannst það skrýtið hvað ég sagði lítið, ég var meðvitaður um það að ég væri á þremur spjöldum. Ég er búinn að standa mig vel að halda mér á þessum þremur.“

Víkingum dugar jafntefli á sunnudag en Blikar þurfa að sækja til sigurs, Halldór segir það bara jákvætt.

„Það hefur þannig séð jákvæð áhrif, það hefði verið skrýtið að spila upp á jafntefli eða að það myndi duga. Við höfum verið frá því í lok júní varla mátt misstíga okkur. Liðið hefur andlega verið sterkt og sótt þá sigra, ég er nánast fegin að þurfa ekki að hugsa út í það að jafntefli dugi.“

Halldór hrósar svo Víkingum fyrir sigurinn gegn Cercle Brugge í gær. „Virkilega vel gert hjá Víkingum, mikilvægt fyrir Ísland í stigasöfnun að elta þetta 33 sæti á lista UEFA sem myndi gjörbreyta stöðu Íslands. Mikilvægt fyrir þá og landið, og senda þau skilaboð að við erum komin langt sem fótboltaþjóð.