Arnar Gunnlaugsson segir að Valdimar Þór Ingimundarson kantmaður liðsins verði ekki klár gegn Breiðablik á sunnudag í úrslitaleik Bestu deildarinnar. Það kemur í ljós í dag að Oliver Ekroth verði klár.

Víkingur vann frækinn sigur á Cercle Brugge í gær en hvernig er staðan á leikmönnum?

„Staðan er þokkalega miðað við allt og ekkert, Halldór Smári fékk í öxlina í gær og kom í lagi úr myndatöku. Hann er frá í 3-5 vikur, svo er þetta barátta. Ég er ekki í mind games, mjög ólíklegt að Valdimar taki þátt í leiknum. Oliver fer í test í dag og þá kemur í ljós hvort hann sé klár, aðrir eru brattir og klárir í slaginn,“ sagði Arnar á fréttamannafundi í Víkinni í dag.

Mikill ríkur hefur komið upp á milli Víkings og Breiðabliks á undanförnum árum.

„Fyrst og fremst var þetta íþróttalegur ágreiningur, bæði lið voru að sækjast eftir því að vera á toppnum. Þá skapast rígur, þjálfarar, leikmenn og áhorfendur taka þátt í þessu. Ég vona að hann endi ekki með hápunkti á sunnudag, þetta eru tveir bestu klúbbarnir í dag. Svo bætist við árangur í Evrópukeppni, þetta er show buisness. Við þurfum að standa okkur til að auglýsa íþróttina, fólk hefur gaman af þessu. Dóri er rólegri en Óskar og ég er þroskaðri.“

Arnar er þó ekki rólegri en það að hann verður í banni á sunnudag. „Ég er það rólegur að ég er í banni, undir niðri kraumar rígur og báðir aðilar til í að gera hvað sem er til þess að vinna á sunnudag.“

„Ég ætla ekki að segja leikplanið mitt núna, það er svo sterkt DNA í Blikum og sterkt DNA í Víkingum. Bæði lið leyfa sér ekki að fara í neitt annað, það væri öðruvísi fyrir okkur að fara í low block að verjast. Ég ætla að vona að menn fari ekki að hugsa of mikið um þetta, þú segir ýmislegt fyrir leiki og þú ætlir að vinna leikinn. Svo gerist eitthvað í leiknum sem þú ræður ekki við, ég ætla að vona að leikmenn fara ekki að bakka en ég skil það vel ef einhverjir fara þá leið. Þá er það okkar að minna þá hvað Víkingur stendur fyrir.“

Arnar vonast eftir fjörugum leik á sunnudag en Víkingum dugar jafntefli enda með betri markatölu en Blikar. „Ég vona að þetta verði markaleikur á sunnudaginn, fari 3-3.“