Eiður Smári Guðjohnsen fyrrum framherji Chelsea, Barcelona og fleiri liða var gestur á Vellinum hjá Símanum á mánudag þar sem farið var yfir leiki helgarinnar í enska boltanum.
Hörður Magnússon stýrði venju samkvæmt umræðum um málið en Hörður fór að ræða stöðu Arsenal og hvort félagið væri að fara á taugum. Hvort Arsenal væri í vandræðum með að höndla mótlæti.
„Ekki bara Arteta, heldur Arsenal-liðið höndlar ekki nógu vel mótlæti, enn þá,“ sagði Eiður Smári á Vellinum.
Arsenal hefur stigið skref upp á við síðustu ár án þess að ná að vinna ensku deildina. Rætt var um hegðun Mikel Arteta stjóra Arsenal á hliðarlínunni, Eiður telur að leikmenn spái lítið í því.
„Þeir eru búnir að vera á siglingu að klífa upp töfluna, tímaspursmál hvenær þeir ættu að vinna titilinn ef þeir halda sínum bestu mönnum. Þegar ég var inni á vellinum, Mourinho, Guardiola. 85 prósent af tímanum varstu ekkert að spá því hvað þjálfarinn var að gera á hliðarlínunni. Þú heyrir ekkert nema það komi dauður punktur og hann kemur skilaboðum inn á völlinn.“
Eiður er hins vegar með kenningu um að dómarar séu komnir með upp í kok af Arteta.
„Ég get ekki ímyndað mér að það hafi áhrif á leikmennina, er þetta farið að hafa áhrifa á dómarann og fjórða dómarann. Eru þeir orðnir þreyttir á þessu tuði í hverri viku? Bara dómarar geta svarað til um það,“ sagði Eiður.
