Sparkspekingurinn og hlaðvarpsstjarnan Mikael Nikulásson var gestur Helga Fannars Sigurðssonar og Hrafnkels Freys Ágústssonar í Íþróttavikunni þetta skiptið.

Það var að sjálfsögðu rætt um karlalandsliðið í þættinum. Liðið spilaði tvo leiki á dögunum, 2-2 jafntefli gegn Wales og 2-4 tap gegn Tyrklandi. Það vakti athygli og furðu margra hversu lítið Gylfi Þór Sigurðsson spilaði í leikjunum. Hann kom við sögu undir lok leiks við Wales en var ónotaður varamaður gegn Tyrkjum.

„Ég beið bara eftir því að hann kæmi inn á. Hann hefði getað róað leikinn niður. Hann er leikmaður sem þú getur alltaf sent á, tekið boltann. Jói er þannig líka en hann var orðinn þreyttur,“ sagði Hrafnkell.

Gátttaður Mikael tók þá til máls

„Ég er búinn að fylgjast með þessu í 45 ár og ég man eiginlega ekki eftir meiri þvælu. Þetta er svipað og að Argentína væri 1-0 yfir í leik og að Messi væri tekinn út af því það þarf að verjast.

Það var þarna sem ég áttaði mig á því að við að við þyrftum að skipta um þjálfara. Þetta fór verulega í taugarnar á mér. Þetta er besti landsliðsmaður okkar frá upphafi. Ég skildi ekki af hverju hann var ekki í byrjunarliði í þessum leik en svo bara kom hann ekki inn á. Þetta var ekki fótboltalegs eðlis og ég get ekki ímyndað mér að Gylfi Þór Sigurðsson mæti í þessa landsleiki í nóvember,“ sagði hann.

„Ég held að Gylfi mæti í næsta mánuði en að hann kalli þetta gott ef þetta verður aftur svona,“ sagði Hrafnkell að endingu.

Umræðan í heild er í spilaranum.

Íþróttavikan er í boði Bola léttöl og Lengjunnar