Aron Einar Gunnarsson fyrirliði íslenska landsliðshópsins gæti komið inn í hópinn sem Age Hareide kynnti í dag fyrir leiki gegn Wales og Tyrklandi.
Aron spilaði sinn fyrsta leik með Al-Gharafa í Katar í gær og átti fínan leik í góðum sigri í Meistaradeildinni í Asíu.
Aron fann til aftan í læri í leiknum og er á leið í myndatöku þar sem kemur í ljós hvort hann komi inn í hópinn.
„Hann fann til aftan í lærinu og fer í myndatöku, við sjáum svo hver staðan er,“ sagði Hareide á fréttamannafundi í dag.
Hareide talaði um að ekki væri gott að fá inn mann í hópinn sem væri tæpur vegna meiðsla. Verði Aron ekki klár er búist við því að Júlíus Magnússon verði kallaður inn í hópinn.
Aron er að koma sér á fulla ferð eftir erfið meiðsli en lék sex leiki með Þór í Lengjudeildinni áður en hann skipti yfir til Katar og er byrjaður að spila þar.
