Rashford var ekki valinn í hóp United fyrir bikarleikinn gegn Newport á sunnudag í kjölfar þess að hann missti af æfingu eftir gott skrall í Belfast á fimmtudag. Var hann einnig sektaður um 650 þúsund pund. Áðurnefndur þjónn er Sarah Adair og hún segir leikmanninn aldrei hafa ætlað sér að ná æfingu enska stórliðsins á föstudag.
Sarah afgreiddi Rashford og hans gengi á veitingastaðnum sem hún vinnur á. Þetta var um klukkan 14 á fimmtudag en henni var svo boðið að djamma með Rashford og félögum um kvöldið. Hún segir að á þessum tímapunkti hafi knattspyrnumaðurinn þegar verið farinn að sturta í sig tekíla.
Sarah kannaðist sjálf ekki við Rashford en yfirmaður hennar gerði það, enda mikill stuðningsmaður United. Hann bað stjörnuna um mynd en hann neitaði í fyrstu. Svo samþykkti hann það gegn því að Sarah fengi að fara fyrr til að djamma með þeim.
Rashford spurði svo Söruh hvort einhverjir næturklúbbar væru opnir lengur en til 3 um nóttina, gegn því að hann myndi borga þeim fyrir það. „Þarna sá ég að hann ætlaði sér aldrei á æfinguna á föstudeginum,“ segir Sarah.
Rashford var búinn að leigja alla efri hæð staðarins fyrir sig og spilaði sína eigin tónlist. Sarah segir að hann hafi tjáð sér á staðnum að hann væri búinn að drekka í allan dag. „Hans markmið var að verða drukkinn þetta kvöld,“ segir Sarah, en einn vinur hans hafði minnt hann á að það væri æfing daginn eftir.
Þaðan lá leiðin á næturklúbb en þar segir Sarah að Rashford hafi rifist við franska stelpu sem hafði verið með honum allt kvöldið. Sakaði hún hann um að kyssa aðra konu. Sarah segir frönsku stelpuna hafa sagt við sig: „Ég er svo reið því hann heldur að hann geti gert það sem honum sýnist.“
Sarah segir að um klukkan 2 um nóttina hafi vinir Rashford ákveðið að hann væri búinn að drekka nóg og lá leiðin upp á hótel. Á leiðinni af staðnum náðist myndband af Rashford sem annar gestur staðarins tók og þá sagði einn í teymi Rashford við hann: „Þú munt koma honum í vandræði með þessu.“
Sarah segir frá því að franska stelpan hafi ekki fengið að koma með þeim inn á hótel þrátt fyrir að hafa reynt það ítrekað. Rashford á að hafa sótt eigur hennar og hent þeim á jörðuna. Öryggisverðir vísuðu henni svo í burtu.
„Mér er alveg sama,“ sagði Rashford við Söruh er hún reyndi að malda í móinn fyrir hönd þeirrar frönsku.
Rashford yfirgaf herbergið svo klukkan 5 um nóttina og flaug burt frá Belfast til Manchester klukkan 7.
Það kemur Söruh ekki á óvart að leikmaðurinn hafi lent í vandræðum í kjölfarið. „Ég skil ekki að hann hafi haldið að hann kæmist upp með þetta.“
United tilkynnti þó í gær að málið hefði verið leyst innan herbúða félagsins.
The Sun birti grófa tímalínu ferðar Rashford til Belfast sem athyglisvert er að skoða:
