Goðsögn Arsenal, Jens Lehmann, var handtekinn í kvöld en frá þessu er greint í þýskum fjölmiðlum.

Lehmann var frábær markvörður á sínum tíma en hann lék ófáa leiki með Arsenal sem og þýska landsliðinu.

Samkvæmt fregnum kvöldsins var Lehmann handtekinn mjög ölvaður undir stýri en hann hafði verið á bjórhátíðinni Oktoberfest.

Atvikið átti sér stað á sunnudag en Lehmann var verulega drukkinn og átti í erfiðleikum með að blása í áfengismæli lögreglunnar.

Lehmann er 54 ára gamall og greinir Bild frá því að hann hafi ferðast með lögreglubíl niður á stöð fyrir skýrslutöku.

Þetta er ekki í fyrsta sinn sem Lehmann lendir í lögreglunni en hann var handtekinn árið 2023 fyrir að saga niður tré nágranna síns og sektaður um 400 þúsund pund.