Freyr Alexandersson segir fjölmiðla í Belgíu í ljúga, hann hafi ekki sviðsett veikindi til að fljúga til Wales og funda með Cardiff.

Frétt í belgískum miðlum í morgun vakti athygli þar sem Freyr var sagður hafa logið til um veikindi.

Þar sagði að Freyr hefði látið leikmenn liðsins vita að hann væri veikur og myndi ekki stýra æfingu en Freyr segir það tóma þvælu.

„Eina lygin er það sem stendur í þessari grein. Myndi aldrei setja upp svona leikrit,“ skrifaði Freyr á X-ið.

Breska ríkisútvarpið segir að Freyr sé einn þeirra sem okmi til greina sem næsti stjóri Cardiff City í Championship deildinni. Erol Bulut var rekinn úr starfi og er liðið að leita að þjálfara.

Freyr hefur áður verið nefndur til sögunnar sem næsti stjóri Cardiff og fyrir því er góð og gild ástæða. Vincent Tan eigandi Cardiff er einnig eigandi Kortrijk þar sem Freyr hefur starfað síðustu níu mánuði og gert vel.

Það væri því leikur einn fyrir Tan að fá Frey til að taka við en Freyr hætti með Lyngby í upphafi árs til að taka við Kortrijk.

Cardiff er á botni B-deildarinnar í Englandi en Freyr ásamt nokkrum öðrum virðast koma til greina sem næsti stjóri liðsins.