Orri, sem fagnar 20 ára afmæli sínu á fimmtudag, hefur slegið í gegn með FCK á leiktíðinni og er með 7 mörk í 11 leikjum. Hann hefur verið orðaður við fjölda liða í bestu deildum heims undanfarna daga.
Í gær sagði The Athletic frá því að City hefði augastað á honum. Félagið sér hann sem framherja til að styðja við Erling Braut Haaland eftir að Julian Alvarez fór til Atletico Madrid. Það kom þó einnig fram að það væri ekki víst hvort Englandsmeistararnir myndu reyna við Orra áður en þessum félagaskiptaglugga lokar. Félagið fylgist hins vegar með gangi mála.
Staðarmiðillinn Manchester Evening News birti grein um Orra nú í morgunsárið sem ber heitið: „Hver er Orri Óskarsson? 17 milljóna punda framherjinn sem Man City gæti fengið til að styðja við Erling Haaland.“
Þar er til að mynda komið inn á yngri ár Orra hjá Gróttu og þá staðreynd að hann hafi spilað fyrsta meistaraflokksleik sinn þar áður en hann náði 14 ára aldri. Var það árið 2018 í 2. deildinni. Þá var Óskar Hrafn Þorvaldsson, faðir Orra, þjálfari Gróttu og táningurinn skoraði einmitt tvö mörk í þessum fyrsta leik sínum.
Einnig er komið inn á uppgang Orra hjá FCK og að hann hafi þurft að vera þolinmóður eftir tækifærinu með aðalliðinu, þar sem hann átti svo gjörsamlega eftir að slá í gegn.
Sem fyrr segir er City ekki eina félagið sem hefur sýnt Orra áhuga. Í sömu frétt The Athletic í gær var til að mynda sagt frá því að Porto og Real Sociedad gerðu það einnig.
