Alvaro Morata, leikmaður AC Milan, hefur nú tjáð sig um skilnað við eiginkonu sína Alice Campello en fjölmiðlar um allan heim hafa fjallað um málið.

Parið var saman í sjö ár en ákvað að skilja á dögunum stuttu eftir að Morata yfirgaf Madríd til að flytja til Milan og spila þar í landi í annað sinn.

Morata er ásakaður um að hafa haldið framhjá eiginkonu sinni og að það hafi kostað hann sambandið en Spánverjinn þvertekur fyrir þær sögusagnir.

Ástæðan er sú að Alice vildi ekki flytja í enn eitt skiptið en Morata hefur einnig spilað á Englandi og lék þar með Chelsea.

,,Ég er miður mín en ég lofa því að ég hef aldrei haldið framhjá í sambandinu. Hún er mikilvægasta konan í mínu lífi,“ sagði Morata.

,,Ég er orðinn svo þreyttur á að heyra sögusagnir um að ég hafi haldið framhjá henni og ég jafnvel sleppti því að fagna með spænska landsliðinu svo svona orðrómar myndu ekki fara af stað.“

,,Ég hef ekki átt í samræðum við aðra manneskju því ég ber virðingu fyrir henni og geri allt til að koma í veg fyrir að slúðurfréttir hafi áhrif á okkar samband.“

,,Alice vildi ekki yfirgefa Spán og flytja í enn eitt skiptið. Við erum ekki á sömu blaðsíðu en erum það þegar kemur að börnunum okkar.“