Pep Guardiola, stjóri Manchester City, viðurkennir að það fari að styttast í það að hann taki ákvörðun um eigin framtíð.
Guardiola hefur þjálfað City frá árinu 2016 og gert frábæra hluti og var orðaður við enska landsliðsstjórastarfið í sumar.
Guardiola hefur áður viðurkennt að hann hafi áhuga á að þjálfa landslið en engar líkur eru á að hann taki við enska liðinu á þessu ári.
Spánverjinn gæti þó íhugað stöðu sína næsta vetur og eru góðar líkur á að hann taki sér pásu frá íþróttinni.
,,Ég verð að íhuga hvað ég vil gera við mitt eigið líf, hvort ég vilji halda áfram hér, ef ég vil taka pásu eða hvort ég vilji þjálfa landslið,“ sagði Guardiola.
,,Ég er mjög spenntur fyrir komandi tímabili því þannig horfi ég á hlutina. Það er ný áskorun fyrir okkur, að bæta eigið met.“
