Markvörðurinn Ederson er sennilega á förum frá Manchester City til Sádi-Arabíu í sumar. The Athletic fjallar um yfirvofandi skipti leikmannsins í dag.

Brasilíumaðurinn hefur verið hjá City í sjö ár og unnið allt sem hægt er að vinna. Nú fer hann hins vegar að öllum líkindum í peningana í Sádí, en bæði Al-Ittihad og Al-Nassr hafa áhuga.

Ástæður þess að Ederson vill fara, eða allavega ein þeirra, er þó heldur furðuleg miðað við það sem kemur fram í grein The Athletic í dag.

Ederson er nefnilega sagður pirraður á öllu lofinu sem varamarkvörður City, Stefan Ortega, fékk eftir leik gegn Tottenham í vor. Ortega átti ótrúlega vörslu frá Heung-Min Son í leiknum sem átti stóran þátt í að City skákaði Arsenal í baráttunni um Englandsmeistaratitilinn.

Eftir leik mátti heyra stuðningsmenn segja að Ederson, sem fór meiddur af velli í leiknum, hefði ekki varið þetta og þar fram eftir götum. Það var hann alls ekki sáttur með.

Eftir leik birti Ederson færslu sem í stóð: „Enginn skilur mig nema ég.“ Þetta ku vera ein af ástæðum þess að han vill fara.

Það er talið að Ortega muni verja mark City á næsta ári, frekar en að félagið fái inn annan mann til að leysa af Ederson.