Manchester United virðist vera á eftir hægri bakverði í sumar og eru bæði Noussair Mazraoui og Vanderson á blaði.
Mazraoui er 26 ára gamall og hefur verið hjá Bayern Munchen í tvö ár. Hann er fjölhæfur og getur einnig leyst stöðu vinstri bakvarðar og farið upp á miðju, sem gæti gert hann að heillandi kosti fyrir United. Þýska stórveldið vill um 20-25 milljónir evra fyrir hann.
Bæði Bild og Sky Sports segja United og einnig West Ham hafa áhuga á þessum landsliðsmanni Marokkó, en síðarnefndi miðillinn segir United einnig hafa augastað á Vanderson.
Sá er 23 ára gamall og á mála hjá Monaco. Hann á að baki tvo A-landsleiki fyrir Brasilíu. Hann getur einnig leikið ofar á vellinum.
Loks er Youssouf Fofana, miðjumaður sem einnig er á mála hjá Monaco, orðaður við United í frönskum miðlum. Franska félagið vill um 35 milljónir evra fyrir kappann.
Það virðist vera nóg að gera á skrifstofu United þessa dagana. Félagið hefur þegar klófest Joshua Zirkzee frá Bologna og Leny Yoro frá Lille. Þá eru rauðu djöflarnir á eftir Matthijs de Ligt, miðverði Bayern.
