Uli Hoeness, goðsögn Bayern Munchen, hefur gefið í skyn að Matthijs de Ligt sé á förum frá félaginu í sumar.

Hoeness er í sambandi við stjórn þýska stórliðsins en hann var forseti félagsins áður en hann hætti árið 2019.

De Ligt er sterklega orðaður við Manchester United á Englandi sem er að leita að öðrum hafsent fyrir komandi tímabil.

De Ligt þekkir stjóra United, Erik ten Hag, nokkuð vel og eru góðar líkur á að hann spili á Old Trafford í vetur.

,,Það er mögulegt að varnarmaður sé á förum. De Ligt er hollenskur og þjálfari Man United er hollenskur,“ sagði Hoeness.

,,Það væri ekki vandamál ef hann verður áfram en ég myndi persónulega ekki selja Dayot Upamecano.“