Tómas Þór Þórðarson, ritstjóri enska boltans á Símanum, sagði ansi skemmtilega sögu frá því hann ferðaðist til að sjá sína menn í Víkingi takast á við írska liðið Shamrock Rovers ytra á dögunum.

Liðin mættust í 1. umferð undankeppni Meistaradeildarinnar. Fyrri leiknum á Íslandi lauk með markalausu jafntefli en Shamrock vann seinni leikinn 2-1 eftir grátlegan endi þar sem Nikolaj Hansen klikkaði á víti fyrir Víking.

Tómas var mættur út til Írlands í seinni leikinn ásamt góðum hópi Víkinga. Er Íslendingarnir hituðu upp fyrir leikinn á bar nokkrum barst áhugavert símtal frá stuðningsmönnum Shamrock.

„Það kom símtal á barinn þar sem var spurt hvort það væri íslenkt lið þarna,“ sagði Tómas í útvarpsþættinum Fótbolti.net á X-inu um helgina.

„Gætirðu nokkuð spurt hann hvort þeir vilji koma í slag? Við erum svona 20, ef þeir vilja að við mætum getum við farið fyrir hornið og tekið aðeins á því,“ var því næst sagt í símann.

Starfsmaður barsins bar þetta undir stuðningsmenn Víkings sem afþökkuðu en buðu írsku stuðningsmönnunum að koma í bjór og söngva ef áhugi væri fyrir hendi.

„Svo voru náttúrulega engin læti,“ sagði Tómas.

„Málið var að stuðningsmenn Djurgarden höfðu áður verið á þessum sama bar og það kemur kannski ekki á óvart að þeir þáðu þetta boð með þökkum.“