Norrköping hefur verið í veseni í sænsku úrvalsdeildinni en Arnóri þó gengið vel. „Ég hef ekki farið leynt með það að ég var opinn fyrir því í janúar, ég held þessu öllu opnu. Ég set standarinn hærra en það sem er verið að bjóða upp á núna,“ sagði Arnór Ingvi í Chess After Dark fyrir um mánuði síðan.
„Ég er búinn að láta vita að þetta er eitthvað sem ég sætti mig ekki við, fleiri loforð sem hafa ekki staðist. Þetta hefur ekki gengið nógu vel.“
Meira
Arnór Ingvi upplifir svikin loforð í Svíþjóð og vill burt – „Eitthvað sem ég sætti mig ekki við“
Magni Fannberg var fyrr í sumar ráðinn sem íþróttaráðgjafi hjá Norrköping. Á dögunum var hann einmitt í viðtali við Chess After Dark og var spurður út í ummæli Arnórs.
„Það er aldrei gott að lykilmönnum líði svona og segi það sem hann sagði, hvort sem það er rétt eða ekki. Það verður að taka á því,“ sagði hann þar.
„Ég skil Arnór Ingva mjög vel. Liðinu gengur illa og hann er að spila vel, honum gengur vel í landsliðinu og sér möguleikana þar. Ég held að það skilji allir hans afstöðu í þessu en ég held að klúbburinn verði hreinlega að taka það á sig að þetta á aldrei að ganga svo langt að lykilleikmaður og jafn vel gefinn drengur og Arnór þurfi að lenda í þessari aðstöðu, að þurfa að koma hingað til að tjá sig um hvernig honum líður,“ bætti hann við og sagði ummæli Arnórs fljótt hafa ratað inn á borð til Norrköping.
