Höskuldur Gunnlaugsson, fyrirliði Breiðabliks, hefur fulla trú á að liðið snúi einvígi sínu gegn Tikves í Sambandsdeildinni við á morgun. Norðurmakedónska liðið leiðir með einu marki.

Um er að ræða leik í 1. umferð undankeppninnar en Tikves vann fyrri leikinn ytra 3-2 þrátt fyrir að Blikar höfðu komist í 0-2 í leiknum.

„Mér finnst menn vera einbeittir og klárir í að svara að einhverju leyti fyrir hvernig þessi leikur úti endaði. Þó svo að frammistaðan hafi í raun verið mjög fín og þroskuð kemur ekkert annað til greina en að keyra yfir þetta á morgun með öflugri aðferð og með því að sýna okkar rétta andlit,“ sagði Höskuldur í samtali við 433.is í dag.

Hann var spurður að því hvað honum fannst fara úrskeiðis er Blikar misstu niður forskot sitt í Norður-Makedóníu í síðustu viku.

„Mér fannst við bregðast illa við fyrsta markinu sem við fáum á okkur. Við vorum búnir að vera með góð tök á leiknum og með frumkvæðið, svo einhvern veginn hristir þetta fyrsta mark í okkur þó það væri ekkert í kortunum. Þeir valdeflast við það og kasta öllu fram en við missum stjórn í raun og veru, þeir nýttu sér það á einhverjum 9 mínútum sem er full mikil blæðing fyrir slæma kaflann í leiknum.“

Breiðablik fór alla leið í riðlakeppni Sambandsdeildarinnar í fyrra og er farið að líða vel með að spila mikilvæga Evrópuleiki.

„Það breytist ekkert að þetta er það skemmtilegasta við sumrin. Það er aðeins öðruvísi stemning og við kunnum vel við okkur í Evrópu. Við búum yfir síðasta ári og árin þar á undan. Við höfum nokkuð reglulega farið langt í þessum keppnum og auðvitað lengst síðast. Við þurfum að nýta þá reynslu,“ sagði Höskuldur.

Ítarlegt viðtal við Höskuld er í spilaranum.