Manchester United tapaði æfingaleik gegn Rosenborg í Noregi í gær og var frammistaðan ekki merkileg.

Það stefndi í markalaust jafntefli þegar Noah Holm skoraði sigurmarkið í blálokin, lokatölur 1-0.

Menn á borð við Marcus Rashford, Aaron Wan-Bissaka, Jonny Evans, Mason Mount og Casemiro byrjuðu leikinn fyrir United en voru teknir af velli í hálfleik. Var það fyrirfram ákveðið.

Sigur Rosenborg hefði getað verið stærri í gær. Liðið átti 22 skot að marki United og skaut fjórum sinnum í stöngina eða slána áður en sigurmarkið loks kom.

Þetta er einmitt tölfræðiþáttur sem United var í vandræðum með í fyrra. Liðið fékk á sig 20 eða fleiri skot í 15 leikjum í ensku úrvalsdeildinni í fyrra. Það er vakin athygli á þessu í enskum miðlum í dag.

„Úrslitin skipta ekki öllu máli, þetta er undirbúningstímabil. En hjá Manchester United er ákveðinn standard sem þarf að fylgja. Frammistaðan er það sem skiptir máli og hún var ekki nógu góð í dag,“ sagði Erik ten Hag, stjóri United, eftir leik.