Það eru einhverjir sem kannast við nafnið Reuell Walters en hann er fyrrum undrabarn bæði Tottenham og Arsenal.

Walters er 19 ára gamall í dag en hann hafnaði nýjum samningi hjá Arsenal í sumar og hefur nú krotað undir hjá Luton.

Luton staðfesti skipti Walters í gær en hann er fjölhæfur varnarmaður sem getur spilað í miðverði og í hægri bakverði.

Hann á athyglisverða sögu að baki en Walters er þekktastur fyrir það að hafa búið til kort í tölvuleiknum Fortnite sem heitir RJW BoxPVP.

Þetta varð gríðarlega vinsælt árið 2019 en Walters hafði lítið annað að gera á tímum COVID-19 og einbeitti sér að tölvuleiknum.

The Sun greinir frá því að Walters hafi þénað 10 þúsund pund eða um 1,8 milljónir króna á hverju kvöldi í viku eftir að kortið var gefið út en Epic Games, eigandi Fortnite, sá um að borga þann pening.

Tæplega 300 milljónir hafa náð í þetta ágæta kort í tölvuleiknum en faðir leikmannsins var steinhiss er hann komst að því hvað væri að eiga sér stað.

,,Hann sagði við mig að hann hefði fengið 20 dollara fyrir kortið sitt. Að fólk væri að spila það sem hann hafði búið til og væri að kaupa hluti með ‘V-Bucks.’

Ansi skemmtilega saga á bakvið þennan ágæta strák sem fær vonandi tækifæri með aðalliði Luton á næsta tímabili.