Manchester United ætlar að hlusta á tilboð í Marcus Rashford þar sem samband hans og knattspyrnustjórans Erik ten Hag er í molum.

The Sun greinir frá þessu en þar kemur jafnframt fram að Rashford og Ten Hag hafi varla talast við undir lok síðustu leiktíðar í kjölfar þess að sóknarmaðurinn var gripinn á djamminu í Belfast skömmu áður en hann átti að mæta á æfingu.

Þarna hafði Ten Hag þegar aðvarað Rashford fyrir að fara á djammið í kjölfar taps gegn Manchester City í október.

Á dögunum varð ljóst að Ten Hag verður áfram stjóri United á næstu leiktíð og virðist framtíð Rashford því ráðin.

Talið er að United vilji um 80 milljónir punda fyrir leikmanninn en 60 milljónir punda er þó raunhæfara markmið eftir dapurt tímabil hans.

Rashford á að mæta aftur til æfinga á mánudag en svo virðist sem framtíð hans liggi annars staðar.