Það vakti athygli í gær eftir tap Vals gegn KA í undanúrslitum Mjólkurbikarsins að fjöldinn allur af krökkum hljóp inn á völlinn á Akureyri til að ná tali af og fá eiginhandaráritun frá Gylfa Þór Sigurðssyni.

Þetta er að vísu ekkert nýtt því síðan Gylfi gekk í raðir Vals í vetur hefur hann gefið sér mikinn tíma í að sinna aðdáendum eftir leiki. Það sama var uppi teningnum eftir svekkjandi 3-2 tap Vals fyrir norðan í gær. Þetta var til umræðu í hlaðvarpinu Dr. Football.

„Ímyndaðu þér að vera Gylfi Sig, kominn með 40 krakka í andlitið beint eftir leik. Hann höndlar þetta svo vel,“ sagði þáttastjórnandinn Hjörvar Hafliðason.

Arnar Sveinn Geirsson, fyrrum leikmaður Vals og formaður Leikmannasamtakanna, hrósaði Gylfa fyrir þetta.

„Það væri auðvelt að vera bara í tilfinningunum. Það er aðdáunarvert hvernig hann höndlar þetta. Ég hef hugsað þetta eftir leiki á Hlíðarenda, hann kemst ekki út af vellinum af því hann er að kvitta á svo mikið af pappírum hjá einhverjum krökkum.

En ef hann virkilega nennti þessu ekki þá væri hann búinn að segja eitthvað við einhvern hjá Val, að þetta gangi ekki. Hann er bara að gefa til baka,“ sagði Arnar.