Riðlakeppni Evrópumótsins í Þýskalandi er formlega lokið en það var F-riðill sem rak lestina í kvöld. Þar var mikil spenna.

Georgía þurfti sigur á móti Portúgal sem hafði þegar unnið riðilinn og gerði átta breytingar. Fyrrnefnda liðið sýndi magnaða frammistöðu gegn Cristiano Ronaldo og félögum og komust yfir strax á 2. mínútu með marki Khvicha Kvaratskhelia. Þetta reyndist eina mark fyrri hálfleiks.

Portúgalir náðu aldrei að ógna almennilega í kvöld og Georgíumenn komust í 2-0 á 57. mínútu er Georges Mikautadze skoraði af vítapunktinum. Meira var ekki skorað og sanngjarn sigur Georgíu staðreynd.

Á sama tíma mættust Tékkar og Tyrkir, þar sem fyrrnefnda liðið þurfti sigur. Þetta byrjaði þó ekki vel fyrir þá því Antonin Barak fékk sitt annað gula spjald og þar með rautt á 20. mínútu. Staðan í hálfleik var þó markalaus.

Hakan Calhanoglu kom Tyrklandi yfir snemma í seinni hálfleik en Tomas Soucek svaraði fyrir Tékkland um miðjan hálfleikinn. Cenk Tosun skoraði svo sigurmark Tyrkja í blálokin og gerði út um von Tékka. Lokatölur 1-2.

Portúgal, Tékkland og Georgía fara áfram úr þessum riðli og þýða úrslit kvöldsins einnig að Ungverjar eru úr leik, en þeir gerðu sér vonir um að komast áfram sem eitt af fjórum bestu liðunum í þriðja sæti.