Það var heldur betur dramatík í D-riðili Evrópumótsins í dag en síðasta umferðin í riðlinum var að klárast. Austurríki endar á að vinna riðilinn.

Austurríki mætti Hollandi í lokaleiknum en liðið hafði tapað gegn Frökkum en unnið Pólland og var því með þrjú stig.

Holland var með fjögur stig eftir sigur á Póllandi en jafntefli gegn Frakklandi. Staðan var 0-1 fyrir Austurríki í hálfleik en Donyell Malen setti boltann í eigið net.

Síðari hálfleikurinn var hins vegar frábær skemmtun en Cody Gakpo sóknarmaður Liverpool jafnaði fyrir Holland.

Romano Schmid kom Austurríki yfir áður en Memphis Depay jafnaði aftur fyrir Holland á 75 mínútu. Adam var þó ekki lengi í paradís því fimm mínútum síðar tryggði Marcel Sabitzer liðinu sigur í leiknum og í riðlinum.

Því á sama tíma mættust Frakkland og Pólland og þar lauk leiknum með 1-1 jafntefli, Kylian Mbappe kom Frakklandi yfir með marki úr vítaspyrnu en Robert Lewandowski jafnaði sömuleiðis úr vítaspyrnu.

Austurríki vinnur því riðilinn með sex stig, Frakkar enda í öðru sæti með fimm og Holland í því þriðja með fjögur stig en öll liðin fara áfram.