Það kom upp óhugnanlegt atvik í leik Ungverjalands og Skotlands á EM í gær. Þá féll Barnabas Varga meðvitundarlaus til jarðar eftir högg frá markverðinum Angus Gunn, en þeir kljáðust um boltann.

Varga lá meðvitundarlaus um tíma en var að lokum borinn af velli og farið með hann á sjúkrahús. Ungverska knattspyrnusambandið staðfesti í gærkvöldi að Varga væri með meðvitund og ástand hans stöðugt, en að hann þyrfti sennilega að fara í aðgerð.

Þetta var til umræðu í hlaðvarpi Íþróttavikunnar á 433.is um EM. Þar fannst mönnum atvikið óneitanlega minna á þegar Christian Eriksen hneig til jarðar í leik Danmerkur gegn Finnlandi á EM fyrri þremur árum.

„Eftir að hafa horft á síðasta Evrópumót, þó það hafi verið öðruvísi atvik þar sem Eriksen hneig niður upp úr þurru, þá var þetta mjög óhugnanlegt, þegar þeir mættu með einhverja borða til að setja í kringum hann og þess háttar. En vonandi fer þetta vel hjá honum,“ sagði Helgi Fannar Sigurðsson.

„Þetta rifjar upp óþægilegar minningar, þessi borði sem er settur í kring svo það sjáist ekkert. Og að sjónvarpið vilji ekki sýna aftur frá þessu,“ sagði Hörður Snævar Jónsson áður en Helgi tók til máls á ný.

„Þá veit maður alltaf að það er eitthvað alvarlegt. En það verður mögulega að setja aðeins út á viðbrögð Þjóðverjanna. Þeir eru heillengi inn á með börurnar. Þjálfari og leikmenn Ungverjalands voru að öskra þá áfram og það endar með því að leikmenn Ungverjalands taka börurnar af þeim og hlaupa að Varga.“