Miðjumaðurinn Weston McKennie viðurkennir að hann sjái verulega eftir því að hafa samið við enska félagið Leeds 2023.

McKennie var lánaður til Leeds í hálft tímabil frá Juventus en gat lítið sem ekkert er liðið féll úr efstu deild.

McKennie er enn á mála hjá Juventus í dag og spilaði 38 leiki á síðustu leiktíð en mistókst að skora mark.

Bandaríkjamaðurinn viðurkennir að tíminn hjá Leeds hafi verið erfiður en hann þurfti að kynnast nýjum lífstíl og nokkrum þjálfurum sem tóku við á stuttum tíma.

,,Tíminn minn hjá Leeds var líklega einn af mínum lágpunktum, ef ekki sá lægsti á mínum ferli,“ sagði McKennie.

,,Ég reyni alltaf að horfa á það jákvæða því ég var hjá Juventus og spilaði í hverri viku og kannski missti ég hausinn aðeins, vitandi það að ég myndi spila alla leiki.“

,,Að fara til Leeds og spila eins og ég gerði og hvernig þetta endaði allt saman – fjórir þjálfarar á fimm mánuðum, ekkert af þessu var eins og ég hafði ímyndað mér.“