Manchester United og Arsenal þurfa að borga 85 milljónir punda ef félögin vilja semja við miðjumanninn öfluga Xavi Simons í sumar.
Frá þessu greinir Bild í Þýskalandi en Bayern Munchen hefur einnig sýnt Hollendingnum áhuga.
Simons er 21 árs gamall en er lykilmaður í hollenska landsliðinu sem spilar nú á EM í Þýskalandi.
Saga Simons er áhugaverð en hann er samningsbundinn PSG í Frakklandi og kom þangað frá Barcelona 2019.
Tækifærin hafa þó verið fá og var miðjumaðurinn lánaður til bæði PSV Eindhoven og RB Leipzig þar sem hann stóð sig vel.
PSG veit af áhuga enskra liða á leikmanninum og mun ekki sætta sig við minna en 85 milljónir punda í glugganum.
