Adam Ægir Pálsson, leikmaður Vals, var gestur í nýjasta þætti af Íþróttavikunni á 433.is. Helgi Fannar Sigurðsson og Hrafnkell Freyr Ágústsson hafa umsjón með þættinum.

Þær fréttir bárust á dögunum að búið væri að reka Gregg Ryder frá KR. Pálmi Rafn Pálmason, sem var aðstoðarmaður hans, mun stýra liðinu gegn Víkingi í kvöld.

„Mér finnst þetta bara ekki rétt út frá því hvað er að koma inn. Ég er ekkert viss um að þetta sé betra. Ég myndi skilja þetta ef Óskar (Hrafn Þorvaldsson) væri að koma inn. Ég held það hefði verið allt í lagi að gefa Gregg meiri tíma. En þið vitið hvernig KR virkar, það er alltaf pressa og ekki oft innistæða fyrir henni.“

Adam segir þetta hafa komið sér nokkuð á óvart.

„Já, í raun og veru. Mér fannst þeir tala í byrjun eins og þetta væri verkefni sem tæki tíma og hann sagði meira að segja sjálfur að þetta myndi taka tíma. Hann er líka alveg með þokkalega breytt lið. En jú jú, fótbolti er úrslitabransi.“

Adam spilaði með Val gegn KR í mögnuðum leik á dögunum. Lauk honum með 3-5 sigri þeirra rauðklæddu.

„Þeir voru svolítið opnir til baka. Þegar þetta trekk í trekk þarftu að gera ráðstafanir. En þetta er stíll sem þeir eru að prófa áfram og það er allt í lagi. Það eru auðvitað allir að stefna að titlinum en það má líka reyna að byggja einhvern stíl. Það tók Breiðablik og Víking nokkur ár að móta það sem þau eru komin í núna,“ sagði Adam.

Umræðan í heild er í spilaranum.

Íþróttavikan er í boði Bola léttöl og Lengjunnar