Hinn 62 ára gamli Wayne er bróðir Gary Lineker, fyrrum landsliðsmanns Englands og sjónvarpsstjörnu. Hann er þekktur í skemmtannabransanum á Ibiza og fleiri spænskum eyjum, þar sem hann á fjölda skemmtistaða.
Í síðustu viku komst hann í fréttirnar eftir að hann var kýldur til jarðar eftir að hafa átt í orðaskiptum við hóp yngri manna. Var hann fremur illa haldinn eftir höggið, var blóðugur og steinlá í sex mínútur. Lögregla mætti á svæðið en á endanum yfirgaf Wayne svæðið í leigubíl.
Meira
Myndband af óhugnanlegri árás á Spáni fer eins og eldur í sinu – Fórnarlambið er vel þekktur maður
Kappinn lét þetta þó ekki á sig fá og hefur hann verið áberandi á djamminu á Ibiza undanfarna daga. Margir virðast vera að fá nóg af honum og menningunni sem staðir hans, þá sérstaklega O Beach á Ibiza, hafa búið til. Mikill hávaði kemur frá staðnum nær allan sólarhringinn og er hann þá sagður hafa ýtt undir eiturlyfjamenningu.
Antonio Lorenzo er stjórnmálamaður á eyjunni og lét hann Wayne heyra það eftir að hann kom sér í fréttirnar á dögunum. Hann gæti aðeins sjálfum sér um kennt og væri fórnarlamb þeirrar óhóflegu drykkjumenningar sem hann hafði sjálfur búið til.
„Þetta verður ekki leyst með aukinni öryggisgæslu. Þetta verður leyst með því að breyta ferðaþjónustumódelinu,“ sagði Lorenzo enn fremur, en margir eru orðnir þreyttir á of mörgum ferðamönnum á eyjunni, sem og fleiri spænskum ferðamannastöðum.
Sem fyrr segir hefur Wayne verið áberandi á djamminu eftir árásina. Á föstudag sást hann á spjallinu við stelpur á bilinu 20-30 ára.
Stjórnmálamenn eru ekki þeir einu sem hafa látið Wayne heyra það en íbúar eru orðnir ansi þreyttir á honum. Einhverjir netverjar hafa tekið svo djúpt í árina að hann sé að eyðileggja eyjuna.
