Óhætt er að segja að virkir í athugasemdum hafi tekið mjög illa í þá breytingu sem RÚV hefur boðað á dagskrá sinni í sumar.

Þannig verða kvöldfréttir á RÚV seina á ferðinni í sumar og segir á vef RÚV. „Kvöldfréttirnar færast frá klukkan 19 til 21 í sumar, frá og með föstudeginum 14. júní. Er það gert til að lágmarka rask sem EM karla í fótbolta og Ólympíuleikarnir í París hefðu annars í för með sér.“

Mun þetta gilda fram í miðjan ágúst en engar fréttir verða klukkan 22:00 á þessu tímabili. „Á meðan stórmótunum stendur verða engar sjónvarpsfréttir klukkan 22, en fréttirnar færast aftur í fyrra horf mánudaginn 12. ágúst,“ segir á vef RÚV.

Undir frétt sem RÚV birtir um málið fær stofnunin yfir sig fúkyrðaflaum frá fólki sem virðist mjög illa við íþróttir.

Flestir sem tjá sig undir færslu RÚV taka mjög illa í þessar breytingar en Egill Helgason, einn virtasti fjölmiðlarýnir þjóðar segir þetta heppilegan tíma.