Louis van Gaal, fyrrum stjóri Manchester United, segir að landi sinn Erik ten Hag sé ekki búinn að gera ‘ frábæra hluti’ sem þjálfari liðsins.

Ten Hag er umdeildur en hann vann þó enska bikarinn með liðinu á síðasta tímabili og verður líklega áfram næsta vetur.

Van Gaal segir að það væri ekki rétt að reka Hollendinginn úr starfi en að hann þurfi að bjóða upp á betri frammistöðu eftir sumarfríið.

,,Auðvitað eiga þeir ekki að reka hann en ég þurfti líka meiri tíma hjá Manchester United. Ég vann FA bikarinn og enginn þjálfari undanfarin 20 ár hafði gert það sama,“ sagði Van Gaal.

,,Nei þú þarft ekki að reka hann, hann þarf meiri tíma en ég þarf líka að gagnrýna. Hann hefur ekki gert frábæra hluti þarna, það er hægt að segja það. Hann hefur samt sýnt að hann er góður þjálfari.“