Sparkspekingurinn Ian Wright hefur tjáð sig eftir forsíður ensku blaðanna sem vöktu athygli eftir tap gegn Íslandi á föstudag.

Ísland kom öllum á óvart og vann 1-0 sigur á Wembley en Jón Dagur Þorsteinsson skoraði eina mark leiksins.

Á allavega fjórum forsíðum enskra blaða mátti sjá Bukayho Saka, leikmann Arsenal, en hann byrjaði ekki einu sinni viðureignina.

Saka var samt stimplaður sem sökudólgurinn miðað við forsíður blaðanna og var þá mynd af honum haldandi á pappírsflugvél vinsæl.

Enskir miðlar eru duglegir að bauna á sitt eigið landslið ef illa gengur en það er stutt í að liðið hefji keppni í lokakeppni EM í Þýskalandi.

,,Núna meira en áður þá skulum við standa við bakið á þessum ungu strákum,“ sagði Wright á X eða Twitter.

,,Við getum séð hvað gerðist og hver á að vera andlit tapsins. Þeir sem ákveða hvað fer á forsíðuna vita hvað þeir eru að gera.“

,,Höldum einbeitingunni og gefum þessum leikmönnum ást og stuðning á meðan mótinu stendur.“