Það er talið að fjögur stór nöfn bíði nú og krossi fingur um að vera í enska landsliðshópnum hans Gareth Southgate fyrir EM í sumar.

Southgate mun kynna hóp sinn síðar í dag en sá hópur mætir fyrst Íslandi og Bosníu í undirbúningsleikjum fyrir EM í Þýskalandi.

Daily Mail segir að þeir Jack Grealish, Marcus Rashford, Raheem Sterling og Kalvin Phillips óttist það allir að missa sæti sitt í landsliðinu fyrir komandi stórmót, en þeir hafa verið hluti af liðinu undanfarin ár.

Grealish átti ekki sitt besta tímabil hjá Manchester City og það sama má segja um liðsfélaga hans þar, Phillips, sem átti vægast sagt skelfilegt tímabil. Miðjumaðurinn var lánaður til West Ham eftir áramót og ekkert gekk upp.

Rashford olli þá vonbrigðum hjá Manchester United eftir flott tímabil í fyrra.

Sterling átti ágætis tímabil og skoraði tíu mörk og lagði upp átta.