Portúgalinn Nani upplifði heldur betur óþægilegt augnablik er hann lék með Manchester United í ensku úrvalsdeildinni.

Nani klikkaði á vítaspyrnu í leik við Fulham árið 2011 en hann átti upphaflega ekki að taka spyrnuna heldur Ryan Giggs.

Nani vildi þó fá sénsinn á punktinum án leyfis frá þjálfara liðsins, Sir Alex Ferguson, sem var bálreiður eftir lokaflautið.

Nani hafði lofað því að keyra Ferguson heim eftir leikinn og var bílferðin svo sannarlega óþægileg til að byrja með.

,,Giggs stóð þarna og hélt á boltanum, ég tók hann til hliðar og tók boltann af honum því ég vildi taka vítið,“ sagði Nani.

,,Ég klikkaði á spyrnunni, Guð minn góður. Leiknum lauk með 2-2 jafntefli, við hefðum unnið 3-2 ef ég hefði bara skorað.“

,,Ferguson öskraði á Giggs eftir leik: ‘Með alla þessa reynslu, hvað í andskotanum ertu að gera? Af hverju ertu að leyfa honum að taka vítið?’

,,Stuttu seinna snýr Ferguson sér að mér og segir að ég muni aldrei fá að taka víti aftur. Tveimur mínútum síðar vorum við saman í mínum bíl og horfðum á veginn, við sögðum ekki orð.“

Ferguson var þó ekki lengi að fyrirgefa Portúgalanum og var blóðheitur eftir lokaflautið.

,,Ég baðst svo afsökunar á vítaspyrnunni og hann sagði að það væri í lagi, að ég ætti að sparka fasta í hornspyrnum en að allt væri í góðu.“