Í gær var greint frá því að Jóhannes Karl Guðjónsson hefði sagt starfi sínu sem aðstoðarþjálfari íslenska karlalandsliðsins lausu til að taka við AB í Danmörku. Menn velta því nú fyrir sér hver tekur við starfi hans í Laugardalnum.

AB spilar í dönsku C-deildinni en ætlar sér stærri hluti og Jóhannesi fannst verkefnið spennandi. Eftir situr starf hans hins vegar laust í Laugardalnum.

„Ég spái því að þetta verði bara einhver innan KSÍ, Ólafur Ingi, Davíð Snorri eða einhver,“ sagði Mikael Nikulásson í nýjasta þætti Þungavigtarinnar.

„Einhvers staðar heyrði ég það að Óskari Hrafni hefði verið boðið þetta. Það hefði nú alveg eins verið hægt að sleppa því símtali ef það er rétt,“ sagði Mikael enn fremur léttur í bragði, en eins og flestir vita sagði Óskar upp hjá norska úrvalsdeildarliðinu Haugesund á dögunum.

Kristján Óli Sigurðsson tók til máls en hann telur það rétt skref hjá Jóhannesi að fara aftur í félagsliðaboltann.

„Jói Kalli er bara þannig gæi að hann vill vera á æfingasvæðinu 6-7 daga í viku. Ekki bara taka tarnir eins og í Laugardalnum. Þetta er fínt fyrir ungan og metnaðarfullan þjálfara. Hann hefur engu að tapa þarna,“ sagði Kristján.

Jóhannes hafði verið aðstoðarþjálfari landsliðsins í rúm tvö ár. Hann hefur einnig stýrt ÍA og HK hér á landi.