Erik ten Hag, stjóri Manchester United, er á lista hjá forráðamönnum Bayern Munchen í kjölfar þess að Ralf Rangnick hafnaði því að taka við liðinu. Sky í Þýskalandi segir frá.

Bayern er í stjóraleit en ljóst er að Thomas Tuchel er á förum. Nokkrir hafa verið orðaðir við starfið og Ten Hag er sem stendur nafn sem félagið vill. Það hefur þó ekki sett sig í samband við hann enn.

Samkvæmt frétt Sky vill Ten Hag klára næsta tímabil með United, en samningur hans rennur út eftir ár. Sé það ekki í boði er hann klár í að taka við Bayern.

Julien Lopetegui, fyrrum stjóri Real Madrid og síðast stjóri Wolves, var einnig á óskalista Bayern en útlit er fyrir að hann taki við West Ham.