Fram er spáð 3. sæti í Lengjudeild kvenna af fyrirliðum, þjálfurum og formönnum deildarinnar. Óskar Smári Haraldsson er þjálfari liðsins og er brattur fyrir sumrinu.

„Þetta er bara skemmtilegt. Það er gaman að sjá að aðrir þjálfarar, fyrirliðar og formenn hafi sömu trú og við þjáfarar Fram höfum á stelpunum fyrir sumar. En spá er bara spá og það á margt eftir að gerast. Deildin er gríðarlega jöfn og það eru mörg lið sem vilja vera í toppbaráttu. Það er undir okkur komið að sanna að þessi spá sé góð og gild,“ sagði Óskar við 433.is á kynningarfundi deildarinnar í Laugardalnum í dag.

Fram hafnaði í sjöunda sæti Lengjudeildarinnar í fyrra sem nýliði. Yrði það að enda í þriðja sæti tröppugangurinn sem hann og þjálfarar óska eftir.

„Já, að einhverju leyti. En við verðum að passa okkur að fara ekki of hratt í hlutina heldur. Fram sem kvennalið er bara frekar nýlegt, var sett á laggirnar aftur 2020. Við gerðum virkilega vel fyrir tveimur árum síðan og í fyrra náðum við þeim lágmarksmarkmiðum sem við settum okkur, að halda okkur í deildinni,“ sagði Óskar.

„Við höfum gert vel í vetur. Liðið er að verða betra með árunum, leikmenn að verða betri. Við höfum þjappað okkur vel saman og höldum kjarna liðsins frá því í fyrra en bætum líka við okkur öflugum leikmönnum. Þetta er tröppugangur og við ætlum klárlega að gera betur en í fyrra, það segir sig svolítið sjálft.“

Nánar er rætt við Óskar í spilaranum.