Fjórum leikjum var að ljúka í 8-liða úrslitum Evrópudeildarinnar en framlengt er í einum þeirra.

Liverpool heimsótti Atalanta og þurfti að vinna upp þriggja marka tap í fyrri leiknum. Mohamed Salah kom enska liðinu yfir strax á 7. mínútu og því von fyrir lærisveina Jurgen Klopp.

Þeim tókst hins vegar ekki að fylgja þessu eftir og meira var ekki skorað. Atalanta vinnur einvígið samanlagt 3-1.

Í London tók West Ham á móti Bayer Leverkusen. Nýkrýndu Þýskalandsmeistararnir í Leverkusen unnu fyrri leikinn 2-0 og því á brattann að sækja fyrir West Ham. Heimamenn komust þó yfir með marki Michail Antonio á 13. mínútu eftir flotta sendingu Jarrod Bowen. Allt galopið.

Hamrarnir leituðu að öðru marki en allt kom fyrir ekki og í blálokin jafnaði Jeremie Frimpong fyrir Leverkusen og gerði út um einvígið. Samanlagt 3-1 fyrir Leverkusen sem er komið áfram.

Roma sló þá út AC Milan. Fyrri leik liðanna lauk 0-1 fyrir Roma sem vann 2-1 á heimavelli í kvöld. Gianluca Mancini og Paulo Dybala gerðu mörk Roma en Matteo Gabbia skoraði fyrir Milan. Samanlagt 3-1 eins og í áðurnefndum einvígum.

Það er framlengt í Frakklandi þar sem Marseille tekur á móti Benfica. Staðan eftir venjulegan leiktíma er 1-0 og samanlagt 2-2.