Helgi Fannar Sigurðsson skrifar frá Wroclaw
„Allir eru heilir og klárir í slaginn,“ sagði Age Hareide, þjálfari íslenska karlalandsliðsins, á blaðamannafundi í Póllandi í dag.
Ísland mætir Úkraínu í úrslitaleik um sæti á EM annað kvöld. Hugsanleg fjarvera lykilmanna hefur verið til umræðu, þar á meðal fyrirliðans Jóhanns Berg Guðmundssonar, en miðað við orð Hareide eru allir klárir.
Þó margir telji Úkraínu sigurstranglegri aðilann hefur Hareide fulla trú á íslenska liðinu.
„Við höfum reynt að skapa einingu sem erfitt er að sigra. Svona leikir eiga sitt eigið líf. Ef þú skoðar úrslitaleiki í öllum keppnum er aldrei hægt að segja hver vinnur. Þetta er þannig leikur.
Einhverjum finnst Úkraína kannski líklegri en að mínu mati er þetta 50/50. Ef við undirbúum okkur rétt er þetta 50/50. Það er meiri pressa á Úkraínu og stundum getur svokallaða litla liðið bitið frá sér.“
Leikurinn hefst klukkan 19:45 annað kvöld.
