Helgi Fannar Sigurðsson skrifar frá Búdapest

Ísak Bergmann Jóhannsson landsliðsmaður telur íslenska liðið eiga góða möguleika gegn Ísrael í leik liðanna á fimmtudag. Liðin mætast í undanúrslitum umspils um sæti á EM.

„Við hlökkum mikið til. Við spiluðum tvisvar við Ísrael í Þjóðadeildinni 2022 og ég tel möguleikana góða,“ sagði Ísak eftir æfingu landsliðsins í kvöld.

Var hann spurður nánar út í þessa tvo leiki árið 2022.

„Þá voru það bara við pjakkarnir. Nú erum við með Jóa, Alfreð, Gulla, Sverri. Bara fullt af landsleikjum. Við gátum alveg unnið Ísrael þá og nú erum við með reynslumeiri leikmenn, sem hjálpar mjög mikið.

Við höfum ekkert farið yfir þá (Ísrael) hérna en gerum það í kvöld eða á morgun. Þeir eru með mjög gott lið eins og flest lið sem eru á þessum stað núna, en mér finnst við vera með betra lið.“

Sem fyrr segir er Ísak fullur sjálfstrausts fyrir leikinn.

„Þetta snýst svolítið mikið um að halda markinu okkar hreinu en svo skorum við alltaf held ég.“