Um er að ræða undanúrslitaleik í umspili um sæti á EM næsta sumar en einhverjir hafa gagnrýnt KSÍ í aðdraganda leiksins og jafnvel gengið svo langt að segja að Ísland eigi ekki að spila leikinn vegna stríðsástandsins á Gaza.
„Þá var auðvelt fyrir KSÍ að taka afstöðu gegn Rússum. Og reyndi í raun aldrei á það að taka raunverulega afstöðu vegna þess UEFA hafði tekið þessa ákvörðun. Það er auðvelt að taka afstöðu gegn einhverju þegar þú hefur engu að tapa. Þegar eitthvað er undir og hætta er á að tapa einhverju, þá vandast málið,“ segir meðal annars í pistli sem birtist á Vísi á þriðjudag.
„Treystir Sýn sér til að sýna leikinn? Þeir eiga þennan leik og þeim blöskrar að við séum að fara að spila. Verðum við þá að bjóða upp á áfallahjálp fyrir Gumma Ben ef hann er að lýsa?“ sagði Hjörvar Hafliðason, þáttastjórnandi Dr. Football, á léttum nótum í nýjasta þætti sínum. Vísir er í eigu Sýnar, sem og Stöð 2 Sport sem sýnir leikinn.
„Ég skal sýna þennan leik inni á Dr. Football.is,“ sagði Hjörvar enn fremur.
Ljóst er að það að neita að taka þátt í leiknum gegn Ísrael myndi hafa í för með sér þungar refsingar fyrir íslenska knattspyrnusambandið.
„Við verðum að velja okkar slagi. Mér finnst afstaða KSÍ í þessu máli búin að vera mjög fín. Það er búið að koma fram ákveðin gagnrýni og sambandið vildi ekki spila í Ísrael. Það er fínasta niðurstaða en við getum ekki farið með málið lengra. Það er á forræði UEFA að beita sér eitthvað frekar í málinu. Ef við gerum eitthvað meira fer fókusinn mögulega af leiknum sjálfum,“ sagði sparkspekingurinn Jóhann Már Helgason sem var einnig með Hjörvari í nýjasta þættinum.
