Sir Jim Ratcliffe ætlar að hrista upp í hlutunum hjá Manchester United eftir að hafa tekið við knattspyrnuhlið félagsins. Svo gæti farið að enska stórliðið skipti um stjóra í sumar.
Sæti Ten Hag þykir alls ekki öruggt en félagið hefur þó ekki tekið neina ákvörðun um framtíð hans.
Ratcliffe og hans menn horfa þó í kringum sig og samkvæmt ESPN eru nöfn Roberto De Zerbi, Thomas Frank og Gareth Southgate á blaði.
De Zerbi hefur verið orðaður við nokkur stórlið eftir frábært starf sitt hjá Brighton og Frank hefur sömuleiðis heillað með Brentford.
Nafn Southgate er nýtt inn í umræðuna en hann er þjálfari enska karlalandsliðsins. Orðrómar eru uppi um að hann muni hætta með liðið eftir EM í sumar.
Það sem ýtir undir það að Southgate gæti tekið við United er samband hans við Dan Answorth, sem er að taka við sem yfirmaður íþróttamála hjá félaginu. Sá starfaði áður hjá enska knattspyrnusambandinu á sama tíma og Southgate var landsliðsþjálfari.
