Elvar Geir Magnússon, ritstjóri Fótbolta.net segir frá því í útvarpsþætti þeirra á X-977 að nokkur reiðir hafi brotist út á meðal áhorfanda í æfingaleik hér á landi á dögunum.

Um er að ræða leik KA og Dalvíkur/Reynis í Lengjubikarnum sem fram fór fyrir tólf dögum. Leiknum lauk með 3-1 sigri KA en margir höfðu veðjað á stærri sigur KA.

Elvar sagði þessa sögu í útvarpsþætti Fótbolta.net á laugardag.

„Veðmálaheimurinn eins og hlustendur vita er orðinn alveg gígantískt stór, rosalegar upphæðir sem eru að fara í gegn. Það var leikur um daginn í Boganum, Dalvík/Reynir á móti KA og þar voru svakalegar upphæðir sem voru að ganga í gegnum,“ sagði Elvar í þættinum.

Hann segir veðmálin sem fólk hafði verið að leggja undir hafi verið með ýmsum hætti en einhver hafi snúist um það að KA yrði yfir í hálfleik.

„Ég veit þetta, ég var að tala við góðan mann fyrir Norðan sem sagði mér þetta. Það voru ýmsar útgáfur af veðmálum, það var búist við því að KA myndi rúlla yfir Dalvík í þessum leik. 1-1 var staðan í hálfleik, þá voru margir búnir aðv eðja á það að KA yrði yfir í hálfleik. KA vann 3-1 sigur, margir höfðu veðjað á stærri sigur KA. Það var angist í stúkunni,.“

Elvar sagði svo frá því að sumir sem veðjað höfðu á leikinn hefðu hreinlega misst stjórn á skapi sínu.

„Einhverjir voru í Reykjavík en þetta var það sem flaug um, að þetta væri það sem ætti að setja á. Svakalegar upphæðir sem voru settar á leikinn, það var barið í veggi og alvöru reiði.“

„Þetta er gott dæmi, þetta er Lengjubikar sem er æfingaleikur í Boganum.“