Það var Ole Gunnar Solskjær sem fékk Cristiano Ronaldo aftur til félagsins 2021 frá ítalska félaginu Juventus.
Ronaldo entist ekki lengi eftir endurkomu til Manchester en hann leikur í dag í Sádi Arabíu með Al-Nassr.
Erik ten Hag, núverandi stjóri United, vildi ekki halda Ronaldo en samband þeirra utan vallar var ekki gott.
Solskjær var rekinn ekki löngu eftir komu Ronaldo en hann er ákveðinn í að það hafi verið rétt að fá sóknarmanninn aftur þar sem hann var í boði.
,,Cristiano vildi yfirgefa Juventus en við töldum það ekki möguleika að fá hann til baka. Við vorum búnir að byggja upp lið án hans,“ sagði Solskjær.
,,Svo fengum við þetta tækifæri og allir voru sammála um að það yrði stórkostlegt fyrir okkur að fá hann aftur.“
,,Hann átti gott fyrsta tímabil og skoraði held ég 28 mörk. Ég elska hversu mikill atvinnumaður hann er en því miður gekk þetta ekki upp að lokum.“
,,Þetta gekk ekki upp fyrir mig og ekki heldur liðið. Á þessum tímapunkti var það rétt ákvörðun að fá hann aftur á Old Trafford.“
