Ole Gunnar Solskjær, fyrrum stjóri Manchester United, hefur tjáð sig um framherjann öfluga, Marcus Rashford.

Rashford kom sér í klípu nýlega er hann var myndaður á djamminu í Belfast og hringdi sig í kjölfarið inn veikan á æfingu United – eitthvað sem Erik ten Hag, stjóri liðsins, var ekki pent sáttur við.

Solskjær þjálfaði Rashford í þónokkur ár og vonar að þetta hafi verið ákveðið spark í rassinn fyrir enska landsliðsmanninn sem hefur verið slakur í vetur.

,,Augljóslega þá þjálfaði ég Marcus í þrjú ár og ég þekki hann vel. Það er ekki mitt að tjá mig um hans frammistöðu í vetur en hann var stórkostlegur í fyrra,“ sagði Solskjær.

,,Marcus sem og aðrir leikmenn United hafa ekki sýnt sitt besta á þessu tímabili en ég er viss um að þetta hafi verið spark í rassinn fyrir hann og vonandi kemst hann í gang.“

,,Er þetta undir stjóranum komið að ná því besta úr honum eða undir honum komið að ná því besta úr sjálfum sér? Það er spurningin.“