Valur Gunnarsson, fyrrum markvörður Leiknis og NFL sérfræðingur var gestur Íþróttavikunnar að þessu sinni. Farið varið yfir sviðið.

Helgi Fannar Sigurðsson og Hrafnkell Freyr Ágústsson voru venju samkvæmt á svæðinu og ræddu fréttir vikunnar.

Fyrst var byrjað á að ræða málefni á Ísafirði en þar hefur Samúel Samúelsson, formaður Vestra staðið í stappi við bæjaryfirvöld og sakað þau um leti og léleg vinnubrögð.

„Hann er ósáttur með að völlurinn sé illa mokaður og ekki tilbúinn, þeir eiga að spila heimaleiki í Lengjubikar og fleira. Bærinn segist vera að gera sitt,“ sagði Helgi Fannar um málið.

Hrafnkell Freyr tók þá til máls. „Ég held að Sammi hafi mjög sterkt mál, ég hef spilað þarna og það var aldrei sérstakt þegar þeir voru neðar í deildunum. Ekki standard hjá liði sem á að vera í efstu deild.“

Valur tók undir með Kela. „Heldur betur, ég er sammála Kela og maður getur séð. Fólk er ekki að drukkna í peningum alltaf, það þarf að hittast á miðri leið. Það væri hræðilegt ef þeir gætu ekki byrjað tímabilið þarna.“

Umræðan er hér að neðan.