Á 81. mínútu virtist ætla að sjóða upp úr þegar Walker missti stjórn á skapi sínu og ræddi bæði við dómara leiksins, Jarred Gillett, og fjórða dómarann, Stuart Attwell. Virtist Walker vera óhress með eitthvað sem Maupey lét út úr sér við hann en á þeirri stundu var mjög óljóst hvað hafði gerst.
Daily Mail fékk Jeremy Freeman, virtan varalesara, til að rýna í það sem fram fór á milli Walkers og dómara leiksins. „Ég ætla að rota hann,“ segir Freeman að Walker hafi sagt við fjórða dómara leiksins.
Gillett reyndi að sussa á Walker og biðja hann að hafa sig hægan en Walker brást við með því að benda á leikmannagöngin og segja Maupey að bíða eftir sér þar eftir leik.
Walker hélt áfram og reyndi að útskýra málið fyrir Gillett. „Dómari, hann talaði um börnin mín, hann talaði um börnin mín. Ekki einu sinni heldur tvisvar.“
Maupey svaraði því til að þetta væri ekki rétt og hann hefði ekki sagt neitt misjafnt við Walker um börnin hans. Gillett reyndi að róa leikmennina niður og sagði að best væri að ræða málið eftir leik. Engir eftirmálar urðu að atvikinu eftir því sem næst verður komið en Walker hefur verið áberandi í bresku pressunni síðustu daga vegna vandamála í einkalífinu.
Eiginkona hans, Annie Kilner, fór frá honum í janúarmánuði eftir að í ljós kom að Walker væri faðir stúlku sen Lauryn Goodman eignaðist síðastliðið haust.
