Theodór Elmar Bjarnason, fyrrum landsliðsmaður og leikmaður KR, var gestur í nýjasta þætti Íþróttavikunnar. Helgi Fannar Sigurðsson og Hrafnkell Freyr Ágústsson hafa umsjón með þættinum, sem kemur út alla föstudaga á 433.is, Hringbraut.is og í Sjónvarpi Símans.

Ísland mætir Ísrael í undanúrslitum umspils um sæti á EM í mars. Elmar spilaði á sínum tíma 41 A-landsleik og telur hann okkar eiga fína möguleika.

„Ég myndi segja að þetta sé 60/40 leikur (Ísrael í vil), á að við vinnum í fyrstu umferðinni það er að segja.“

Elmar segir að hann hafi hrifist af landsliðinu á köflum undanfarin ár en stundum mætti gera mun betur.

„Ég er mjög spentur fyrir þessu. Við erum með flotta unga leikmenn að koma upp. Gæðalega séð er þetta ekkert síðra en þegar við vorum upp á okkar besta. En til dæmis 2016 vorum við með Jóa Berg og Birki Bjarna á köntunum. Þú þurftir aldrei að hafa áhyggjur af því að þeir myndu ekki elta mennina sína niður.

Mér hefur fundist þetta mjög gott á köflum en þetta hefur dottið niður í algjört rusl þess á milli.“

Miklar sviptingar urðu á karlalandsliðinu á skömmum tíma.

„Þetta gerðist aðeins of hratt. Bara alveg eins og hjá KR, það fóru of margir í einu. Það er erfitt að fylla í þessi skörð þegar við erum eins fámenn og við erum. Það koma bara upp ákveðið margir hæfileikaríkir leikmenn á ári. Við náum ekki að fylla alltaf upp í og það verður þannig áfram.“

Umræðan í heild er í spilaranum.